இட்லி உப்புமா

தேவையானவை:

DSC05623

இட்லிகள்- 10
இட்லி மிளகாய்ப்பொடி- 1 தேக்கரண்டி

தாளிக்க:

எண்ணெய்- 1 தேக்கரண்டி
கடுகு- 1 தேக்கரண்டி
வெள்ளை உளுத்தம்பருப்பு- 1 தேக்கரண்டி
மிளகைவற்றல்- 1
கறிவேப்பிலை- 1 இணுக்கு
பெரிய வெங்காயம்- 1

செய்முறை:

1. காலையில் செய்து மீந்த இட்லிகளையோ புதிதாகத் தயாரித்த இட்லிகளையோப் பயன்படுத்தலாம்.
2. தாளிசப்பொருட்களை ஒரு வாணலியில் தாளித்துக் கொண்டு பொடியாக நறுக்கிய வெங்காயத்தைச் சிவக்க வதக்கவும்.
3. இட்லிகளை உதிர்த்துக் கொள்ளவும்
4. தாளிசப்பொருட்களோடு இட்லியைக் கலந்து இட்லி மிளகாய்ப்பொடியையும் சேர்த்துக் கிளறிச் சூடாகப் பரிமாறவும்.
5. மீந்த இட்லிகள் கனமாக ஆகி விடும், வீணடிப்பதற்குப் பதிலாக இவ்வகையில் சுடச்சுட உப்புமா செய்தால் உனக்கு, எனக்கு எனப் போட்டிப் போட்டு கிடுகிடுவென வியாபாரம் ஆகி விடும்.

Advertisements

ஓட்ஸ் இட்லி

Image

தேவையான பொருட்கள்:

ஓட்ஸ் – 2 கிண்ணம்
தயிர் – 1/2 கிண்ணம்
உப்பு- தேவையான அளவு

தாளிக்க:

எண்ணெய்- 1 தேக்கரண்டி
கடுகு- 1/2 தேக்கரண்டி
கடலைப்பருப்பு- 1/4 தேக்கரண்டி
வெள்ளை உளுத்தம்பருப்பு- 1/4 தேக்கரண்டி
பச்சைமிளகாய்- 2
துருவிய கேரட்- 1 கிண்ணம்
கொத்தமல்லி

செய்முறை:

1.முதலில் ஒரு வாணலியை அடுப்பில் வைத்து, அதில் ஓட்ஸைப் போட்டு, பொன்னிறமாக வறுத்து, பின் மின்னரைப்பானில் பொடி செய்து ஒரு பாத்திரத்தில் போட்டு தனியாக வைத்துக் கொள்ள வேண்டும். 

2. பின்பு அதே வாணலியை அடுப்பில் வைத்து, அதில் எண்ணெய் ஊற்றி காய்ந்ததும், கடுகு, உளுத்தம் பருப்பு, கடலைப் பருப்பு சேர்த்து தாளிக்க வேண்டும். பின் பச்சை மிளகாய், கொத்தமல்லி மற்றும் கேரட் சேர்த்து வதக்கி, 1 நிமிடம் கிளறி இறக்கி, அதனைப் பொடி செய்த ஓட்ஸுடன் சேர்க்க வேண்டும்.

3.பிறகு அதில் தயிர் ஊற்றி, இட்லி மாவு பதத்திற்குக் கலந்து கொள்ள வேண்டும். முக்கியமாக இதில் தண்ணீரை சேர்க்கக்கூடாது. உடனடியாக இட்லிகளாக வார்க்காமல் ஒரு மணி நேரம் வெளியே வைக்கவும்.

4. பின்னர் அந்த மாவை இட்லித்தட்டுகளில் எண்ணெய் தடவி இட்லிகளாக ஊற்றி எடுத்தால், சுவையான ஆரோக்கியமான ஓட்ஸ் இட்லி தயார்.

தொட்டுக்கொள்ள சட்னி, துவையல், சாம்பார், மிளகாய்ப்பொடி அருமையாக இருக்கும்.

 

தாளித்த இட்லி

Image

தேவையானவை:

இட்லிகள்- 10

தாளிக்க:

எண்ணெய்- 1 தேக்கரண்டி
கடுகு- 1 தேக்கரண்டி
கடலைப்பருப்பு- 1 தேக்கரண்டி
வெள்ளை உளுத்தம்பருப்பு- 1 தேக்கரண்டி
பச்சைமிளகாய்- 1
மிளகாய்வற்றல்- 1
கொத்தமல்லி- அலங்கரிக்க

வதக்க:
பெரிய வெங்காயம்- 2
தக்காளி- 1
கறிவேப்பிலை- 1 இணுக்கு
உப்பு- சிறிதளவு

செய்முறை:

1. தாளிசப்பொருட்களைத் தாளித்துக் கொண்டு நீளமாக நறுக்கிய வெங்காயம் சேர்த்துச் சிவக்க வதக்கவும். பிறகு தக்காளியும் சேர்த்து வதக்கிக் கொள்ளவும். இதனுடன் காரத்திற்காகச் சாம்பார் தூள் சேர்த்து பொடியின் பச்சை வாடை போகும் வரை வதக்கவும். சிறிதளவு உப்பு சேர்க்கவும்(இட்லியில் உப்பு இருப்பதால் அதிகமாகி விடக் கூடாது)
2. இட்லிகளைப் பிடித்த அளவில் நறுக்கி அல்லது மினி இட்லிகளாக வேக வைத்துக் கொண்டோ தாளித்தவற்றுடன் போட்டுப் பிரட்ட வேண்டும்.
3. சுவையான தாளிச இட்லி சில நிமிடங்களில் தயார்.
கொத்தமல்லி தூவிப் பரிமாற குடும்பத்தினர் உனக்கு எனக்கு எனப் போட்டி போட்டு உண்பர்.

 

சாம்பார் இட்லி

391790_261830667204213_100001318447633_646855_889535222_n

தேவையானவை:

இட்லி- 10
சாம்பார் செய்ய:

துவரம்பருப்பு- 1/2 கப்
புளி- எலுமிச்சை அளவு
சாம்பார் பொடி- 2 தேக்கரண்டி
உப்பு,காயம்,மஞ்சள் தூள்- தேவையான அளவு

காய்கறிகள்:

சின்ன வெங்காயம்- 10
தக்காளி- 1
முருங்கைக்காய்- 8
கறிவேப்பிலை- 1 இணுக்கு
கொத்தமல்லி- அலங்கரிக்க

சாம்பார் தூள் செய்ய:

கடலைப்பருப்பு- 2 தேக்கரண்டி
வெந்தயம்- 1/2 தேக்கரண்டி
தனியா- 2 தேக்கரண்டி
மிளகாய்வற்றல்- 8

தாளிக்க:

நல்லெண்ணெய்- 1 தேக்கரண்டி
கடுகு- 1 தேக்கரண்டி
கடலைப்பருப்பு- 1 தேக்கரண்டி
வெள்ளை உளுத்தம்பருப்பு- 1 தேக்கரண்டி

சாம்பார் பொடி:

1. வாணலியில் வெந்தயத்தைச் சிவக்க வறுக்கவும், பிறகு கடலைப்பருப்பைச் சிவக்க வறுத்துத் தனியே ஆற விடவும்.
2. தனியாவையும் சிவக்க வறுக்கவும்
3. மிளகாய்வற்றலையும் வறுத்து மின்னரைப்பானில் திரித்து வைத்துக் கொள்ளவும்.

சாம்பார் செய்முறை:
1. பருப்பைக் குழைவாக வேக விடவும். வாணலியில் எண்ணெய் விட்டு கடுகு தாளிக்கவும். அதனுடன் சின்னவெங்காயத்தை வதக்கிப் பின் தக்காளி, முருங்கைக்காய் சேர்க்கவும்
2. புளித்தண்ணீரைச் சேர்த்து(3 டம்ளர் அளவுக்கு) உப்பு, மஞ்சள் தூள், 2 தேக்கரண்டி சாம்பார் பொடி, காயம் சேர்த்து மூடி விடவும்.
3. காய் வெந்ததும் வேக வைத்தப் பருப்பைச் சேர்க்கவும்
4. கறிவேப்பிலை, கொத்தமல்லி சேர்க்கவும்.

சாம்பார் இட்லி:

1. இட்லிகளை(மினி இட்லி அல்லது தட்டையான வடிவில் செய்வது நன்றாக இருக்கும்) செய்து ஆற விடவும்.
2. சாம்பாரை இட்லிகளின் மேல் பரவலாகத் தூவவும்.
3. நல்லெண்ணெயில் கடுகு, கடலைப்பருப்பு, வெள்ளை உளுத்தம்பருப்பு சிவக்க வறுத்து தாளிசப்பொருட்களைச் சாம்பார் இட்லியின் மேல் கொட்டவும்.
4. சாம்பாரில் காரம் குறைவு என்றால் தாளிக்கும் போது பச்சைமிளகாயையும் சேர்க்கலாம்.
சுவையான சாம்பார் இட்லி தயார்.

கூடுதல் தகவல்கள்:
1. சின்ன வெங்காயம், தக்காளி, முருங்கைக்காய் கூட்டணியைப் போல முள்ளங்கி, தக்காளி அல்லது குடமிளகாய், காரட், தக்காளி அல்லது வெண்டைக்காஇ போன்ற காய்கள் ருசியை வித்தியாசப்படுத்தும்.
2. சாம்பார் பொடி புதிதாகத் திரித்துப் பண்ணும் போது கூடுதல் சுவை கிடைக்கும்.
3. காலையில் மீந்த இட்லிகளை வியாபாரம் செய்யக் கூட இட்லி சாம்பார் செய்து அசத்தலாம்.

 

புதினா இட்லி

Image

தேவையானவை:

புதினா – இரண்டு கைப்பிடி
கறிவேப்பிலை- 1 இணுக்கு
இஞ்சி- 1 துண்டு
வெள்ளை உளுத்தம்பருப்பு- 1 தேக்கரண்டி
பச்சைமிளகாய் அல்லது மிளகாய்வற்றல் – 2
இட்லி- 10
உப்பு- தேவையான அளவு

தாளிக்க:
நல்லெண்ணெய்- 1 தேக்கரண்டி
கடுகு- 1 தேக்கரண்டி

செய்முறை:

1. புதினாவை மண் போக அலசவும்
2. எண்ணெய் விட்டு வெள்ளை உளுத்தம்பருப்பைச் சிவக்க வறுத்து மிளகாயையும் வறுத்து, புதினா, இஞ்சி,உப்பு சேர்க்கவும். அடுப்பை அணைக்கவும்.
3. மின்னரைப்பானில் வறுத்தனவற்றை அரைக்கவும்.
4. வாணலியில் கடுகு தாளித்து விட்டு அரைத்தக் கலவையைக் கெட்டியாகும் வரை ஐந்து நிமிடங்கள் வதக்கவும்.
5. இட்லிகளை விருப்பமான அளவில் துண்டுகளாக்கிக் கொண்டு கெட்டியான புதினாக்கலவையில் பிரட்டவும்.
6. சுவையான ஆரோக்கியமான புதினா இட்லி தயார்

கூடுதல் குறிப்புகள்:

1. புதினா சளித்தொந்தரவுகளைப் போக்குவதோடு மட்டுமல்லாமல் பல் தொடர்பான பிரச்சினைகள், வாய்த் துர் நாற்றத்தையும் போக்க வல்லது, துவையல், புதினா இட்லி, புதினா சாதம் என்று விதவித முறைகளில் புதினாவைச் சேர்ப்பதன் மூலம் உடலிற்குத் தேவையான சத்துக்களைப் பெறலாம்.
2. காலையில் செய்து மீந்த இட்லிகளைக் கூட இவ்விதச் செய்முறைகளால் சூடாகச் செய்து புதியதாய் பரிமாறலாம்.

கேழ்வரகு (ராகி ) இட்லி

தேவையானவை :

Image
புழுங்கலரிசி-2கப்
ராகி-1கப்
வெந்தயம்-10கிராம்
உளுந்து-1கப்
உப்பு-தேவைக்கேற்ப

செய்முறை:

1. அரிசி, வெந்தயம், ராகி இம்மூன்றையும் ஒன்றாக 5 மணி நேரம் ஊற வைக்கவும்.
2. உளுந்தை ஊற வைத்து குளிர்சாதனப் பெட்டியில் வைக்கவும். (இதனால் அரைக்கும் போது உளுந்து நன்றாக நுரைத்து வரும்)கணிசமும் கிடைக்கும்.
3. உளுந்து அரைத்து எடுத்ததும் ராகி, அரிசி கலவையை தனியாக கரகரப்பாக அரைக்கவும்.
4. கடைசியில் உப்பு, அரைத்த உளுந்து கலந்து எடுத்து மறுநாள் காலை வரை (பொங்கி வருவதற்கு) வைக்கவும்.
5. மற்ற இட்லிகளைப் போல ஆவியில் வேக வைக்கவும்.
6, இட்லியாக சாப்பிட பிடிக்காதவர்கள் , அந்த இட்லிகளை சிறு சிறு துண்டுகளாக்கி , தாளித்துக் கொட்டி, சிறிது எலுமிச்சைச் சாறு பிழிந்து , சாப்பிடலாம், சுவையாக இருக்கும்.

ராகியின் பயன்கள்:

1. ரத்தம் சுத்தியாகும்
2. எலும்பு உறுதிப்படும்
3. சதையை வலுவாக்கும்
4. மலச்சிக்கல் ஒழியும்.
5. அதிக நேரம் பசி தாங்கச் செய்யும்.

தென்னிந்தியர் தாங்கள் தான் அந்தஸ்து, நாகரிகம், வாய்ந்தவர்களென்று கொண்டு நம்பர் ஒன் வெண்மை அரிசியைச் சாப்பிடுகிறார்கள். ராகி விலை மலிவான உணவு என்று கருதுகின்றனர். இது தவறான கருத்தாகும். ராகியின் விலையைப் பார்க்காமல், அதன் பலனைப் பார்க்க வேண்டும்.
‘ராகி’ சத்து மிகுந்தது என்பதற்காக அதனை உடனடியாக அடிக்கடியும் சேர்த்துக் கொள்ளக் கூடாது. அதனை படிப்படியாக வயிற்றுக்கு பழக்க வேண்டும். முதலில் மாதம் இரு முறை எனவும் பிறகு மூன்று முறை எனவும் ஆரம்பிக்க வேண்டும். ராகியில் களி ஒன்று தான் செய்ய முடியும் என்றில்லை. ராகியில் பலவிதமான உணவுகள் செய்யலாம். இவ்வாறு செய்வதால் சாப்பிட மறுக்கும் குழந்தைகளும் விரும்பி சாப்பிடுவர்.

இட்லி மஞ்சூரியன்

idli manchurian

தேவையான பொருட்கள்

இட்லி – 6
சோளமாவு – 1 டேபிள்ஸ்பூன்
கடலை மாவு – 1 டேபிள்ஸ்பூன்
சீரகப் பொடி – 1 டீஸ்பூன்
மிளகாய்த்தூள் – 1 1/2 டீஸ்பூன்
இஞ்சி- 1 தேக்கரண்டி(துருவியது)
பச்சைமிளகாய்- 1
பூண்டு- 1 தேக்கரண்டி(துருவியது)
உப்பு -சுவைக்கு
எண்ணெய் – பொரிக்க
கேசரி கலர் – சிறிதளவு

செய்முறை:

0. idli manchurian

1. இட்லிகளை விரல் நீளத்துண்டுகளாகவோ சதுரமாகவோ நறுக்கவும்.
2. அதனுடன் அனைத்துப் பொருட்களைம் கலந்து,சிறிது தண்ணீர் சேர்த்து நன்கு பிசிறவும்.
3. எண்ணெய் காயவைத்து கலந்து வைத்துள்ள இட்லிகளைப் பொரித்தெடுக்கவும். இட்லிகளைப் பொரிக்காமல் வதக்கியும் செய்யலாம்.
4. கொத்தமல்லி தூவி அலங்கரிக்கச் சுவையான இட்லி மஞ்சூரியன் தயார்.
5.இட்லியா? வேண்டாமென்று அலறும் குழந்தைகளும் விரும்பி உண்ணுவர்,

காலையில் மீந்த இட்லிகளை மாலையில் இம்முறையில் சுட சுடச் செய்ய, உனக்கு எனக்கு எனப் போட்டி போட்டுக் காலி செய்வர்.

————————————————————————————————–